Amen adžahar keraja buti ko Krisinformation.se (Om Krisinformation.se)

Khedimi informacija kotar o švedikane vlastija

O Krisinformation.se obratinela pe e sarinipaske hem odova tano švedikano zaedničko kanali baši krizakiri  informacija. Amen khedaja sa ko jek than kaj te šaj  te ovel lokhe te arakhel pe i informacija, bizi razlika savo vlasti tano odgovorno. O Krisinformation.se ingarela pe kotar o Myndigheten för civilt försvar (Vlasti civilno arakhibaske). 

Amen sakhedaja o najvažno hem daja jek slika. Ko Krisinformation.se dela pe fundamentalno informacija kaj te šaj te kere sar so trebela ki jek situacija. Te mangljan te džane buteder amen šaj te uputina tut ko odgovorna  manuša so kerena buti po hor odole bučencar. O Krisinformation.se informirinela angleder, ki hem pali jek kriza ja pale jek maribe. 

So publicirinaja

Ko Krisinformation.se šaj lea preduprediba, aktualno informacija hem godidejbe bašo odova sar šaj te pripremine tut bašo razna krize. I redakcija publicirinela hem intervjuija hem reportaže kori so vakerela pe bašo krizakere pripreme hem sar kerela pe buti e krizaja.

Pismena izvorija

Isi jek preduslov kaj te šaj o Krisinformation.se te posredinel informacija, odova tano so o vlasti, komuna ja pale javer disavo odgovorno društveno akteri isi ole publicirimo i informacija pismeno. O Krisinformation.se lenkinela uvek akala  informacijakere izvorija, kaj te šaj tu sar posetiteli te dikhe kotar avela i informacija.

Kanalija

O Krisinformation.se tano jek webbthan, ama isi ole hem jek aplikacija  hem ov tano hem ko socialno kanalija. Šaj čhivela pe pučiba e redakcijake ko Facebook, Instagram ja pale ki e-pošta. Amen siam hem ki platforma X.

Javera čhibja

Ko Krisinformation.se isi informacija ki švedikani čhib, anglikani hem ki lokhi švedikani čhib. Jek fundamentalno informacija bašo ko primer vešengorothabljojbe hem bašo panjeskoronanibe tani prevedimi ko disave čhibja. Amen prevedinaja hem ko buteder čhibja keda ovela bareder krize hem javera oviba.